Lithethe indondo yesine Igqishamnkantsha

Cornelius Luphahla
UMCULI wodumo wakuleli ocula umculo kamaskandi useyithethe njalo indondo yesine wabuya wakhethwa ukuba angene emncintiswaneni we Ukuthula Maskandi Promotion, ngemva kokuthola kwakhe indondo ezintathu emnyakeni ophelileyo.
Umculi lo uPosslet Khumalo oyaziwa ngokuthi Igqishamnkantsha uthethe indondo yesine eye Best Song of the Year Kwazulu Natali kwele South Africa ngemva kokuncintisana labaculi abanengi abatsha abaculi khona.

Igqishamnkantsha lithethe indondo ezintathu kumnyaka ophelileyo ezigoqela iStayela Award eNew Castle, eyeBest Maskandi Newcomer, kuKwaazulu Natal Maskandi Awards, leye Best Song of the Year ku-Umgeni Maskandi Awards ePietermaritzburg kwathi kuyonale inyanga lathatha Indondo yeBest Song of the Year ngengoma yalo ethi Baphehlamanz’amnyama.
UMthunywa uxhumane loGqishankantsha wachaza ukuthi uzwa ejabula ngokukhethwa emncintiswaneni lo wabuya walandisa ngokuthola kwakhe indondo emnyakeni ophelileyo ebonga njalo ekhuthaza uzulu ukuthi amsekele ngokumvotela.
“Ngizwa ngijabula kakhulu ngokuthatha indondo le eye Best Song of the Year ngoba emnyakeni ophelileyo ngithole indondo ezintathu ngedlalade lami elithi Mina Nawe. Emncintiswaneni lo besingabaculi abangu 17 kuthi abaphuma koMthwakazi sibabili.
“Ingoma yami enqobileyo ngethi Baphelamanz’amnyama ekudlalade lami elithi Mina Nawe. Ngalokhu ngikhuthaza abalandeli bami ukuthi baqhubekele phambili ngokungivotela njengalokhu abahlala bekwenza njalo ngibathembisa ukubakhiphela elinye idlalade elitshisayo lonyaka,” kutsho Igqishamnkantsha.
UMduduzi Mkhwananzi omunye wabacula leGqishamnkantsha ubikele intatheli ukuthi ulethemba lokuthi bazayithatha indondo yesihlanu abancintisana kuyo.
“Mina ngilethemba lokuthi abalandeli bethu bazasisekela siyithathe njalo indondo yesine okuyiyo esikhethwe ukuthi sincintisane kuyo labanye abaculi bakamaskandi. Ngokunjalo uzulu sisazomdlalela ingoma zethu ngohlonzi oluphezulu ukuze ahlale ejabulile sibuye simhwatshele idlalade elitshisa bhe,” kuphetha uMduduzi Mkhwananzi.

Source:SwitchNewsnet

Post Author: Switchbod

Leave a Reply

Your email address will not be published. Required fields are marked *